11.2.16

CHAMÁDEME SIMBAD

O alumnado de primeiro de ESO leu nesta avaliación a novela de Francisco Castro Chamádeme Simbad, obra que foi recoñecida na Lista de Honra do IBBY 2012 na modalidade de escritores, Premio Frei Martín Sarmiento 2011 na categoría de 1º e 2º da ESO, Premio ao "mellor libro infantil de 2009" concedido polos lectores da web Fervenzas Literarias.

Trátase dunha historia tenra e emotiva que contrasta, a través do humor, o mundo dos nenos co dos adultos e achéganos  a problemática dunha enfermidade silenciosa que trastoca toda a vida familiar.

"O avó fai cousas raras. Esquécese de todo. Cámbialle o nome a todo o mundo. Incluso ao seu neto. Que se chama Paulo, pero que para o avó é Simbad o Mariñeiro." (presentación editorial)


Que vos parece esta historia? Deixade as vosas reflexións e comentarios de lectura.

5.2.16

PREMIO MARCAPÁXINAS

Xa temos gañadoras do Concurso de Marcapáxinas convocado un ano máis pola biblioteca.

O marcapáxinas gañador foi realizado por CANDELA MAZAIRA LLORENTE (4º C).





O segundo premio recaeu en ELVIRA JING NEGREIRA GÁNDARA(1ª ESO A)




Noraboa as dúas gañadoras!!


17.1.16

OS ESCARAVELLOS VOAN Á TARDIÑA

Os clubs de lectura reanudaron  as súas actividades.

Os alumnos de 3º e 4º están lendo o libro da escritora sueca Maria Gripe, publicado en 1978: Os escaravellos voan á tardiña. Unha historia protagonizada por tres rapaces (David Stendfalt, Annika e JOnás) que acoden a coidar as plantas da Quinta Selanderschen durante o verán. Axiña van descubrir que alí sucede algo estraño. Atopan unha planta especial, a Selandria egytica, cuxas follas se dirixen cara ás escaleiras e non cara á luz. Así chegan ao cuarto de verán no que atopan as cartas escritas por Andreas Wiik a Emilie Selander, no século XVIII. Tamén entrarn en contacto con Julia Jason Andelius, dona da casa... Os enigmas sucédense e serán eles os únicos que poidan desentrañalos.





14.1.16

LERMOS.GAL

Facémonos eco do nacemento de Lermos.gal, o punto de encontro da literatura en galego.
Unha revista en liña dedicada á literatura en lingua galega co obxectivo de informar das novidades e eventos literarios e divulgar todo o relativo ao mundo do libro e da lectura.
Parabéns para este proxecto web. Estaremos atento ao que nos ofreza.



1.12.15

NOVIDADES

Recén chegadas, unha morea de novidades, á espera de lectores desexosos de disfrutalas. Novelas, relatos, poesía... De todo hai!

Hector Cajaraville: De remate. Premio Xerais de novela 2015
Andrea Maceiras: Europa Express. Premio Jules Verne de Literatura Xuvenil 2015
 Marcos Calveiro: Fontán, Premio Narrativa Breve Repsol 2015
Manuel Portas: Lourenço, xograr. Premio García Barros 2015
Xabier Quiroga: Zapatillas rotas. Premio Nacional da Crítica 2015
Antón Riveiro Coello: Os elefantes de Sokúrov
Manuel Rivas: A boca da terra.
Antonio García Teijeiro - Antonio Reigosa: Lendo lendas, digo versos.
Alicia Jiménez Bartlett: Hombres desnudos. Premio Planeta 2015
Daniel Sánchez Arévalo: La isla de Alice. Finalista Planeta 2015






27.11.15

A NEVE INTERMINABLE





Novela de misterio de Agustín Fernández Paz protagonizada por un equipo de guionistas -tres mulleres e dous homes- que reciben a encarga de escribir os guións dunha serie de televisión. Para concentrarse, acoden a un hostal solitario nas terras de Fonsagrada. É inverno e a neve axiña os deixa illados. No hostal comezarán a producirse estraños sucesos...


24.11.15

PREMIOS LITERARIOS 2015

ROTEIRO DA ESMORGA

Os alumnos de 4º participaron no roteiro d'A esmorga. O guía de Turismo, José Ramón Cachaldora, levounos polas rúas cidade, seguindo os pasos do Cibrán, O Bocas e O Milhomes.


5.6.15

ENCONTRO CON FRANCISCO CASTRO

O día 4 recibimos no instituto a Francisco Castro que se reuniu cos alumnos de 1º e 3º de ESO para falar das súas novelas Chamádeme Simbad e O corazón da Branca da Neve. 
Logo do interesante coloquio cos lectores asinou exemplares das súas obras. 
Agradecidos pola súa visita.






25.5.15

CINCO OVEJAS NEGRAS


Cinco ovejas negras é un blog que naceu en setembro de 2014 co obxectivo de difundir a lectura infantil e xuvenil e achegar os libros e a actualidade literaria aos lectores. As súas autoras, cunha longa experiencia no ámbito da biblioteconomía, na docencia e en centros especializados, preparan reseñas e presentación de libros clásicos e actuais.

Noticias de actualidade, entrevistas cos autores, selección de libros clasificados por idade e por temas, relación de autores e ilustradores... unha interesante web que nos achega unha valiosa información acerca do panorama actual da mellor literatura infantil e xuvenil.

Estaremos atentos aos seus consellos e orientacións. 



13.5.15

Gañadores I Concurso Ilustración "Peito de Lobo"

Xa temos gañadores para o I Concurso de Ilustración, organizado pola Biblioteca, o Departamento de Plástica e o Equipo de Dinamización Lingüística.
 Os gañadores foron:
1º premio: María Domínguez Pérez (1º D ESO)
 2º premio: Sara Nogueiras González (1º C ESO)
3º Premio: Alberto Valencia Saco (1º D ESO)  e  Mario López Lois (1º D ESO)

 Felicitamos a todos eles polo seu magnífico traballo. E salientamos a colaboración da profesora de plástica, Juliana Ortega, que coordinou e dirixou a elaboración das imaxes.
 Ademais da publicación en papel, está tamén dispoñible a edición dixital que pode verse neste enlace:
.




Sara Nogueiras

Alberto Valencia

Mario López